Doggone Rubbitch

By Gene Wilkes

A nasty bitch an' a dutty dog
Was limin' dong by de sea,
De bitch get vex an' tell de dog:
Haul yuh tail an' doh bodder me!
When people liming on de beach
I does get real nice food to eat,
It plenty better dan hustlin'
For scraps from dusbin on de street.
So me doh bark at nobody
Even when dey pelt mih wid stone,
When ah wag mih tail real friendly
Ah does get more dan chicken bone.
"Trini people is someting else",
De dutty dog tun rong an' say,
"Dey doh give ah shit bout nutten
When you see dey come out to play.
Dey eat dey food an' drink dey rum
An' leave rubbish all over de place,
You'd tink dat dese dam litterbugs
Doh belong to de human race.
But plenty ah dese same people
Belong to high society,
And does live in posh surroundings
Dat real tidy an' litter free.
TIDCO beach clean up committee
Does boast bout dey annual campaign,
But why should dey have to do dis
Again an' again an' again?
De tons ah rubbish dey pick up
Eh nutten to boast about...
It shows de measures dey using
Eh really have too mucha clout.
Every time dey have dey clean up
To me dey eh doin' it fair...
Good people pickin' up rubbish
Thrown by people who just doh care.
Dey should hold de ones dat litter
An' make dem self clean up dey mess,
Dat would better solve de problem
And be a warning to de res'.
We stray dog an' cobo does try
To clean up de place every time,
But better dan we to clean de mess
Dutty Trinis leave when dey lime."
De dutty dog leave Mayaro,
And went San Fernando to fete,
He hear there had plenty litter
And thought some nice morsels he'd get.
But he bounce up so much vagrant
Competing for food on de streets
Dat he really ketch he nennen
To get a lil someting to eat.
So back to Mayaro he went,
An he say never me again,
Livin' dong dere plenty better
Dan Sando I tellin' yuh plain !